ستمبر 14، 2025
ویب ڈیسک
اسلام آباد: گلگت بلتستان کے مختلف علاقوں میں اتوار کی صبح زلزلے کے جھٹکے محسوس کیے گئے جن کے باعث شہری خوفزدہ ہو کر گھروں سے باہر نکل آئے۔
زلزلہ پیما مرکز کے مطابق ریکٹر اسکیل پر زلزلے کی شدت 3.7 ریکارڈ کی گئی جبکہ اس کی گہرائی زیر زمین 25 کلومیٹر تھی۔ زلزلے کا مرکز اسکردو سے جنوب مغرب کی سمت تقریباً 34 کلومیٹر دور بتایا گیا ہے۔
زلزلے کے جھٹکے گلگت، اسکردو اور استور سمیت قریبی علاقوں میں محسوس کیے گئے۔ مقامی افراد کے مطابق جھٹکے چند سیکنڈز تک جاری رہے جس سے لوگوں میں خوف و ہراس پھیل گیا۔
ابتدائی اطلاعات کے مطابق کسی جانی یا مالی نقصان کی خبر موصول نہیں ہوئی، تاہم متعلقہ اداروں نے صورت حال پر نظر رکھنے کے لیے ٹیمیں متحرک کر دی ہیں۔
ماہرین زلزلہ پیما کا کہنا ہے کہ اس خطے میں معمولی نوعیت کے زلزلے وقتاً فوقتاً آتے رہتے ہیں، تاہم شہریوں کو حفاظتی تدابیر اپنانے کی ضرورت ہے۔
