ستمبر 14، 2025
ویب ڈیسک
لاہور: فلڈ فور کاسٹنگ ڈویژن کے مطابق دریائے سندھ میں پانی کی آمد میں مسلسل اضافہ ہورہا ہے، جس کے باعث گڈو، سکھر اور کوٹری بیراج سیلابی صورتحال سے دوچار ہیں۔
رپورٹ کے مطابق گڈو بیراج پر اونچے درجے کا سیلاب برقرار ہے جہاں پانی کا بہاؤ بڑھ کر 5 لاکھ 61 ہزار کیوسک تک پہنچ گیا ہے۔ سکھر بیراج پر درمیانے درجے کا سیلاب جاری ہے اور یہاں پانی کی آمد 4 لاکھ 80 ہزار کیوسک ریکارڈ کی گئی۔ کوٹری بیراج پر نچلے درجے کا سیلاب ہے جہاں بہاؤ 2 لاکھ 71 ہزار کیوسک تک پہنچ گیا ہے۔
فلڈ فور کاسٹنگ ڈویژن نے مزید بتایا کہ دریائے سندھ میں کوٹ مٹھن (راجن پور) اور چاچڑاں شریف کے مقامات پر پانی کی آمد میں معمولی کمی ریکارڈ کی گئی ہے اور سطح کم ہوکر 11.5 فٹ رہ گئی ہے۔
دریائے چناب میں ہیڈ پنجند پر بہاؤ میں کمی کا رجحان موجود ہے، تاہم اب بھی انتہائی اونچے درجے کا سیلاب جاری ہے اور پانی کا بہاؤ تقریباً 4 لاکھ 60 ہزار کیوسک ریکارڈ کیا گیا ہے۔
اسی طرح دریائے ستلج میں گنڈا سنگھ والا اور ہیڈ اسلام پر درمیانے درجے جبکہ ہیڈ سلیمانکی پر نچلے درجے کا سیلاب ہے۔ دوسری جانب دریائے راوی میں ہیڈ سدھنائی پر پانی کی سطح میں کمی واقع ہوئی اور وہاں کی صورتحال نچلے درجے کے سیلاب میں تبدیل ہوگئی ہے۔
