ایک حالیہ تحقیق سے یہ بات سامنے آئی ہے کہ میڈیکل امیجنگ (ایکس رے سمیت تمام ٹیسٹ جس میں جسم سے تابکاری کا گزر ہوتا ہے) سے بچوں میں خون کے کینسر ہونے کا خطرہ بڑھ جاتا ہے۔
محققین نے انکشاف کیا کہ ایک اندازے کے مطابق خون کے کینسر میں مبتلا 10 میں سے 1 بچہ امیجنگ اسکین کے سبب اس موذی مرض میں مبتلا ہوتا ہے۔
یونیورسٹی آف کیلیفورنیا، سان فرانسسکو کے محقق کا کہنا ہے کہ اگرچہ اکثر کیسز میں جان بچانے کے لیے میڈیکل امیجنگ کروانا ضروری ہے لیکن بچوں میں صحت کے لیے ضروری ہے کہ تابکاری کا ایکسپوژر کم سے کم ہو۔
اس تحقیق کے لیے ماہرین نے 1996 اور 2016 کے درمیان چھ امریکی اور کینیڈا کے ہیلتھ کیئر سسٹمز میں پیدا ہونے والے تقریباً 3.7 ملین بچوں کا جائزہ لیا۔
تحقیق کے دوران خون کے کینسر کے 3000 کیسز کی تشخیص کی گئی، جس سے یہ بات سامنے آئی کہ بچوں کو سی ٹی اسکینز کی بڑھتی ہوئی تابکاری کی سطح سے سب سے زیادہ خطرہ لاحق ہے۔
تحقیق کے نتائج میں جن بچوں کا 1 یا 2 بار سی ٹی اسکین ہوچکا ہے ان میں خون کے کینسر کا خطرہ 80 فیصد تک بڑھ گیا جبکہ اس کے برعکس ایکس رے کے نتیجے میں خون کے کینسر کا خطرہ نسبتاً کم ہے۔
