برطانیہ کے سب سے بڑے موسیقی میلے گلیسٹنبری میں دو فنکاروں کی جانب سے اسرا*ئیل مخالف نعرے بازی پر پولیس نے انکوائری شروع کر دی ہے۔
عالمی خبر رساں اداروں کے مطابق، برطانوی پولیس نے تصدیق کی ہے کہ ریپرز بینڈز باب وائلن (Bob Vylan) اور نی کیپ (Kneecap) کی پرفارمنسز کو پبلک آرڈر واقعہ کے طور پر ریکارڈ کیا گیا ہے۔
الزام ہے کہ دونوں فنکاروں نے نہ صرف اسرا*ئیل اور یہودیوں کے خلاف نعرے لگائے بلکہ برطانوی وزیرِاعظم سر کیئر اسٹارمر پر بھی تنقید کی۔
آئرش ریپ بینڈ Kneecap نے وزیرِاعظم کو نشانے پر رکھا، جبکہ پَنک-ریپ جوڑی Bob Vylan نے اسرا*ئیلی فوج کے خلاف شدید نعرے بازی کی۔
اس موقع پر شائقین فلسطینی پرچم تھامے ہوئے تھے اور فنکاروں کے نعروں کا پُرجوش جواب دے رہے تھے، جس سے ماحول مزید جذباتی ہو گیا۔
یاد رہے کہ Kneecap کے رکن لیام اوہانا (اسٹیج نام: مو چارا) اس وقت عدالتی کارروائی کا سامنا کر رہے ہیں۔ ان پر گزشتہ برس ایک اور تقریب میں حزب اللہ کا پرچم لہرانے اور "اپ حماس، اپ حزب اللہ” کے نعرے لگانے کا الزام ہے۔
واضح رہے کہ برطانیہ میں حماس اور حزب اللہ کو دہشت گرد تنظیمیں قرار دیا گیا ہے، اور ان کی کھلی حمایت کرنا قانونی جرم ہے۔
