بالی ووڈ کے اداکار اکشے کمار اور ارشد وارثی سمیت ہدایت کار سبھاش کپور کو پونے کی ایک سول عدالت نے ان کی آنے والی فلم جولی ایل ایل بی 3 میں عدلیہ کی مبینہ توہین کے الزام پر طلب کرلیا ہے۔
بھارتی میڈیا رپورٹس کے مطابق یہ نوٹس وکیل واجد رحیم خان کی درخواست پر جاری کیا گیا، جس میں الزام عائد کیا گیا ہے کہ فلم میں بھارتی عدالتی نظام کا مذاق اڑایا گیا ہے، عدالتی کارروائی کی توہین کی گئی ہے اور وکالت کے پیشے کو منفی انداز میں دکھایا گیا ہے۔
درخواست گزار نے فلم کے ایک ایسے منظر پر بھی اعتراض اٹھایا ہے، جس میں ججز کو مبینہ طور پر نازیبا الفاظ سے پکارا گیا ہے۔ واجد رحیم خان نے اے این آئی سے گفتگو میں کہا، ’’وکلا اور ججز کا احترام ضروری ہے، جس طرح انہیں پیش کیا گیا ہے وہ ناقابلِ قبول ہے۔‘‘
عدالت نے اکشے کمار، ارشد وارثی اور ہدایت کار سبھاش کپور کو 28 اکتوبر صبح 11 بجے ذاتی طور پر پیش ہونے کا حکم دیا ہے۔
یہ تنازع اس وقت سامنے آیا جب جولی ایل ایل بی 3 کا ٹیزر جاری کیا گیا۔ فلم، جو عدالت پر مبنی ڈرامہ سیریز کا تیسرا حصہ ہے، ستمبر 2025 میں ریلیز کی جائے گی۔
