کراچی: فیڈرل انویسٹی گیشن ایجنسی (ایف آئی اے) امیگریشن نے کراچی ایئرپورٹ پر کارروائی کرتے ہوئے ایک ایسے ملزم کو گرفتار کرلیا جو شہریوں کو غیر قانونی سمندری راستے سے یورپ بھجوانے میں ملوث تھا۔
ترجمان ایف آئی اے کے مطابق گرفتار ملزم کی شناخت شاہد عمران کے نام سے ہوئی ہے، جو ایمرجنسی پاسپورٹ پر مراکش سے کراچی پہنچا تھا۔
ابتدائی تحقیقات میں انکشاف ہوا ہے کہ ملزم طویل عرصے سے مراکش میں غیر قانونی طور پر مقیم تھا اور متعدد پاکستانیوں کو غیر قانونی طریقے سے مراکش بھجوانے میں ملوث رہا ہے۔
ایف آئی اے امیگریشن کراچی نے ملزم کو ابتدائی تفتیش کے بعد ایف آئی اے گوجرانوالہ زون کے حوالے کردیا ہے۔
ترجمان کے مطابق مزید تفتیش جاری ہے تاکہ انسانی اسمگلنگ کے اس نیٹ ورک سے وابستہ دیگر عناصر کو بھی گرفتار کیا جاسکے۔
