کراچی: پیر کے روز کیماڑی فش ہاربر کے قریب کورین سی فوڈ ایکسپورٹ کمپنی کے ملازمین سے چھ مسلح ڈاکوؤں نے ڈیڑھ کروڑ روپے سے زائد کی رقم لوٹ لی۔ ڈاکو دو موٹر سائیکلوں پر سوار تھے اور کمپنی کے گیٹ کے قریب پہنچتے ہی گاڑی کو روک کر اسلحے کے زور پر کیش بیگ چھین کر فرار ہوگئے۔
پولیس کے مطابق کمپنی کے ساتھ تعینات سیکیورٹی گارڈ کو بھی اسلحہ چھین کر بے بس کر دیا گیا، جبکہ وہ کسی قسم کی مزاحمت نہ کرسکا۔ واقعے کی سی سی ٹی وی فوٹیج اور دیگر شواہد پولیس نے حاصل کر لیے ہیں۔
کمپنی کے ترجمان نے تصدیق کی کہ لوٹی گئی رقم ملازمین کے بونس کی ادائیگی کے لیے مختص تھی۔ پولیس نے کمپنی کے اکاؤنٹنٹ اور سیکیورٹی گارڈ کو پوچھ گچھ کے لیے حراست میں لے لیا ہے جبکہ ملزمان کی گرفتاری کے لیے چھاپے مارے جا رہے ہیں۔
