اسکاٹ لینڈ سے تعلق رکھنے والی خاتون نے مشہور ترک تاریخی ڈرامہ کورولوش عثمان دیکھنے کے بعد اسلام قبول کرلیا۔
جولیٹا لورینا مارٹینز نامی اسکاٹش خاتون نے بتایا کہ اُن کا روحانی سفر کووِڈ وبا کے دوران شروع ہوا، جب انہوں نے ترک سیریز جیسے ارطغرل غازی اور کورولوش عثمان دیکھنا شروع کیں۔ ابتدا میں یہ صرف تفریح کے طور پر دیکھا، مگر وقت کے ساتھ ان ڈراموں کے اسلامی پیغامات اور کرداروں نے ان کے دل پر گہرا اثر چھوڑا۔
جولیٹا کے مطابق، ان ڈراموں میں دکھائے گئے کرداروں کی بہادری، ایمان اور اخلاقی قوت نے انہیں ترک تاریخ اور اسلام کے قریب کر دیا۔ اس کے بعد انہوں نے اسلامی کتب کا مطالعہ شروع کیا اور دو سال تک قرآن کریم کو پڑھنے اور غور و فکر کرنے کے بعد وہ ایمان کی روشنی تک پہنچ گئیں۔
انہوں نے کہا، ’’مجھے وہ سکون قرآن سے ملا جو دنیا میں کہیں اور نہیں تھا۔ اس نے مجھے میری اصل سے ملوایا۔‘‘
ترک پروڈکشن کمپنی کے مطابق، جولیٹا نے نہ صرف ترک ثقافت سے دلچسپی لی بلکہ اسلام کی تعلیمات کو گہرائی سے سمجھنے کی کوشش کی، اور روحانی اطمینان حاصل کرنے کے بعد کلمہ شہادت پڑھ کر دائرہ اسلام میں داخل ہوگئیں۔
