راولپنڈی: تھانہ دھمیال کی حدود قائداعظم کالونی میں گھریلو تنازعہ ایک المناک واقعے میں بدل گیا، جہاں مبینہ طور پر چھوٹے بھائی کی اہلیہ نے بڑے بھائی کی بیوی کو آگ لگا دی، جس کے نتیجے میں وہ جان کی بازی ہار گئی۔
پولیس کے مطابق شازیہ فاروق کو تشویشناک حالت میں اسپتال منتقل کیا گیا لیکن وہ ایک روز بعد دم توڑ گئیں۔ مقتولہ کے بیٹے شبیر بھٹی کی مدعیت میں درج ایف آئی آر میں الزام لگایا گیا کہ مسلسل گھریلو ناچاقیوں کے باعث ملزمہ حاجره عدیل نے والدہ کو آگ لگا دی۔
ابتدائی طور پر واقعے کو کمپریسر پھٹنے کا حادثہ قرار دیا گیا تھا، تاہم مقتولہ کی بیٹی ڈاکٹر نمرہ اور ایف آئی آر کے بیان سے انکشاف ہوا کہ وقوعہ کے روز جھگڑا اور دھمکیاں دی گئی تھیں۔ اہلِ محلہ کے اطلاع دینے پر جب دروازہ کھولا گیا تو شازیہ جلی ہوئی حالت میں ملی۔
پولیس ذرائع کے مطابق شواہد اکٹھے کر لیے گئے ہیں، کچن اور کمروں میں آگ کے کوئی آثار نہیں ملے جبکہ ڈیوڑھی میں ہی جلنے کے نشانات پائے گئے۔ اقدامِ قتل کے مقدمے کو اب مقتولہ کی موت کے بعد قتل کی دفعہ 302 کے تحت تبدیل کردیا گیا ہے۔ پولیس نے کہا کہ تفتیش جاری ہے اور ملزمان کو جلد گرفتار کرلیا جائے گا۔
