کراچی، 11 اگست: آئی جی سندھ جیل خانہ جات و اصلاحی خدمات ملک محمد یوسف مجوکہ نے واضح ہدایت جاری کی ہے کہ قیدیوں کے ساتھ کسی بھی قسم کا غیر قانونی سلوک ہرگز برداشت نہیں کیا جائے گا۔ یہ بات انہوں نے صوبے بھر کی جیلوں کے سپرنٹنڈنٹس کے ساتھ ایک آن لائن (زوم) اجلاس میں کہی، جس میں انہوں نے واضح کیا کہ جیل نظام کا مقصد سزا دینا نہیں بلکہ اصلاح کرنا ہے۔
آئی جی نے کہا کہ قیدی اپنی سزا پوری کرنے کے لیے جیل میں ہیں، انہیں غیر انسانی سلوک کا نشانہ نہیں بنایا جانا چاہیے۔ افسران کو قیدیوں کے قانونی اور انسانی حقوق کا احترام کرنے اور ان کی بحالی کے لیے اقدامات کرنے کی ہدایت دی گئی۔
اہم ہدایات میں شامل ہیں:
جیل قوانین اور ایس او پیز پر سختی سے عملدرآمد۔
قیدیوں سے انسانی سلوک اور اختیارات کا غلط استعمال نہ کرنا۔
جیل کے اندر مانیٹرنگ سسٹم کو مؤثر بنانا تاکہ کسی قسم کے غلط سلوک کو روکا جا سکے۔
بدسلوکی میں ملوث اہلکاروں کے خلاف فوری محکمانہ کارروائی۔
آئی جی نے خبردار کیا کہ ہدایات کی خلاف ورزی پر سخت محکمانہ کارروائی کی جائے گی۔ انہوں نے کہا کہ یہ اصلاحات قیدیوں کے ساتھ منصفانہ سلوک، انسانی حقوق کے تحفظ اور جیل نظام کی بہتری کے لیے ہیں۔
