کراچی: سندھ ہائیکورٹ نے کے الیکٹرک کی جانب سے نیپرا کے خلاف دائر تمام درخواستوں کو ناقابلِ سماعت قرار دیتے ہوئے مسترد کردیا۔
عدالت نے دونوں فریقین کے دلائل سننے کے بعد فیصلہ سناتے ہوئے کے الیکٹرک کا بزنس پلان بھی طلب کرلیا۔
کے الیکٹرک کے وکیل نے عدالت میں مؤقف اختیار کیا کہ نیپرا نے 2024 سے 2030 تک کے لیے ٹیرف اور ملٹی ایئر ٹیرف کا تعین کیا تھا، جس پر وزارتِ توانائی نے نظرثانی کی درخواست دائر کی۔ وکیل کے مطابق نیپرا نے اس نظرثانی درخواست کو اپیل میں تبدیل کرکے فیصلہ محفوظ کرلیا۔
وکیل نے مزید کہا کہ وزارتِ توانائی وفاقی کابینہ کی منظوری کے بغیر اپیل دائر نہیں کرسکتی، اور نیپرا کو نظرثانی کی درخواست کو اپیل میں تبدیل کرنے کا اختیار حاصل نہیں۔ مزید کہا گیا کہ نیپرا کی جانب سے تحریری حکم نامہ فراہم نہیں کیا گیا اور کے الیکٹرک کے اعتراضات پر بھی کوئی فیصلہ نہیں سنایا گیا۔
