سائنسدانوں نے سورج کی بیرونی فضا، یعنی "کرونا”، میں ہونے والے چند دلچسپ مناظر کی اب تک کی سب سے واضح تصاویر جاری کی ہیں۔ ان مناظر میں "شمسی بارش”، گرم گیس کی کمانیں، اور پلازما کے باریک دھارے شامل ہیں، جو کیلیفورنیا میں موجود ایک طاقتور دوربین سے ریکارڈ کیے گئے۔
یہ تصاویر امریکہ کی نیشنل سولر آبزرویٹری اور نیو جرسی انسٹیٹیوٹ آف ٹیکنالوجی کے ماہرین نے حاصل کیں۔ انہوں نے ان مناظر کو "تاریخی” قرار دیا ہے کیونکہ اس سے پہلے سورج کی فضا کو اتنی باریکی سے نہیں دیکھا جا سکا تھا۔
ماہرین کے مطابق "شمسی بارش” اس وقت ہوتی ہے جب سورج کی فضا میں موجود پلازما ٹھنڈا ہو کر دوبارہ نیچے آتا ہے۔ یہ عمل سورج کے مقناطیسی فیلڈ کے ساتھ ہوتا ہے اور نظر آنے میں زمین پر ہونے والی بارش جیسا لگتا ہے، بس فرق یہ ہے کہ یہ بارش آگ کی ہوتی ہے۔
یہ تصاویر گوڈ سولر ٹیلی اسکوپ سے لی گئیں، جو بگ بیئر سولر آبزرویٹری میں نصب ہے۔ اس دوربین میں "کونا” نامی جدید نظام لگایا گیا ہے، جو زمین کے ماحول کی وجہ سے ہونے والی دھندلاہٹ کو ختم کرتا ہے اور تصویر کو صاف بناتا ہے۔ اس سسٹم کے ذریعے اب 63 کلومیٹر جتنی باریک تفصیلات بھی دیکھی جا سکتی ہیں، جو پہلے ممکن نہیں تھا۔
سورج کی "کرونا” یا بیرونی فضا، سائنسدانوں کے لیے بہت اہم ہے کیونکہ یہ انتہائی گرم ہوتی ہے اور یہیں سے شمسی ہوائیں پیدا ہوتی ہیں، جو زمین سمیت دیگر سیاروں پر اثر ڈالتی ہیں۔
ان شاندار مناظر کے بعد ماہرین نے اعلان کیا ہے کہ وہ یہی جدید نظام ہوائی میں دنیا کی سب سے بڑی شمسی دوربین پر بھی لگانے کا ارادہ رکھتے ہیں، تاکہ سورج کے بارے میں مزید اہم معلومات حاصل کی جا سکیں۔
