لاہور: فیصل ٹاؤن پولیس نے گھر والوں کی غیر موجودگی میں گھروں کا صفایا کرنے والے گروہ کو گرفتار کر لیا ہے۔
تفصیلات کے مطابق ملزمان کی نشاندہی سی سی ٹی وی فوٹیجز کی مدد سے کی گئی، جن میں انہیں گھروں کے تالے توڑ کر سامان رکشے میں لوڈ کرتے اور فرار ہوتے دیکھا گیا۔ ایس پی ماڈل ٹاؤن کے مطابق ملزمان مختلف علاقوں میں ریکی کرکے ایسے گھروں کو نشانہ بناتے تھے جو خالی ہوں۔
پولیس نے کارروائی کے دوران فریج، اے سی، واٹر کولر، نقدی، دیگر قیمتی اشیاء اور چوری شدہ رکشہ برآمد کرلیا۔ گرفتار ملزمان احمد اور شکیل اب تک لاکھوں روپے مالیت کا سامان چوری کرکے فروخت کر چکے تھے۔
ملزمان کے خلاف مقدمہ درج کرکے مزید تفتیش شروع کر دی گئی ہے۔ ایس پی سیدہ شہربانو نقوی کا کہنا ہے کہ عوام کے جان و مال کا تحفظ پولیس کی اولین ترجیح ہے۔
