اداکارہ ماہرہ خان نے لندن میں اپنی فلم کی پروموشن کے دوران پیش آنے والے ناخوشگوار واقعے پر آخرکار خاموشی توڑ دی ہے۔
ماہرہ خان اور ہمایوں سعید ان دنوں اپنی نئی فلم لو گرو کی تشہیری مہم کے لیے امریکا، لندن، دبئی اور پاکستان کے مختلف شہروں کا دورہ کر چکے ہیں۔ تاہم لندن میں ایک میٹ اینڈ گریٹ تقریب کے دوران بدانتظامی کے باعث ایک ناپسندیدہ واقعہ رونما ہوا۔
تقریب کے دوران ماہرہ خان شدید ہجوم میں گھر گئیں جبکہ ایک سیکیورٹی اہلکار ان کے حد سے زیادہ قریب آ گیا، جس پر ماہرہ خاصی غیرمحفوظ اور پریشان دکھائی دیں۔ اس واقعے کی ویڈیو سوشل میڈیا پر وائرل ہوئی تو مداحوں نے منتظمین پر تنقید کرتے ہوئے سوال اٹھایا کہ اتنی بڑی فنکارہ کے لیے مؤثر سیکیورٹی کا بندوبست کیوں نہیں کیا گیا۔
اسی موقع پر ہمایوں سعید نے صورت حال کی سنگینی کو محسوس کرتے ہوئے فوری طور پر ماہرہ کا دفاع کیا۔ وہ نہ صرف ان کے سامنے آ گئے بلکہ ہجوم کو پیچھے ہٹنے کا بھی کہا۔
بعد ازاں، ایک نجی ٹی وی شو میں شرکت کے دوران ماہرہ خان سے جب اس واقعے پر سوال کیا گیا تو انہوں نے کہا، ’’میں خود کو ایک مضبوط عورت سمجھتی ہوں اور عام طور پر کسی مشکل وقت میں کسی کی طرف نہیں دیکھتی، میں ظاہر نہیں کرتی کہ مجھے کسی کی مدد چاہیے، لیکن اُس لمحے ہمایوں سامنے تھے۔ جب میری نظر ان سے ملی، تو کچھ کہے بغیر وہ سمجھ گئے کہ میں ناخوش اور غیرمحفوظ محسوس کر رہی ہوں، اور وہ فوراً میری مدد کو آگئے۔‘‘
ہمایوں سعید نے بھی اپنی بات میں کہا کہ انہیں لگا کہ ماہرہ کو تحفظ کی ضرورت ہے، اور اگر ایسی صورتحال کسی بھی عورت کے ساتھ ہو تو وہ ضرور آگے بڑھیں گے — چاہے وہ ماہرہ ہوں یا کوئی اور۔
