اسلام آباد/کراچی — پاکستان سمیت دنیا بھر میں ہندو برادری آج روشنیوں کا تہوار دیوالی مذہبی جوش و خروش کے ساتھ منا رہی ہے۔ سندھ، جنوبی پنجاب اور دیگر علاقوں کے مندروں میں چراغاں کیا گیا، جہاں خاندانوں نے پوجا، دعائیں اور مٹھائیاں تقسیم کیں۔
وزیرِ اعظم شہباز شریف، وزیراعلیٰ پنجاب مریم نواز شریف، چیئرمین پیپلز پارٹی بلاول بھٹو زرداری اور سندھ حکومت نے اس موقع پر ہندو برادری کو دلی مبارکباد پیش کی۔
وزیرِ اعظم شہباز شریف نے اپنے پیغام میں کہا کہ دیوالی روشنی کے اندھیرے پر اور امید کے مایوسی پر غلبے کی علامت ہے۔ انہوں نے کہا کہ پاکستان کی مذہبی و ثقافتی تنوع قومی یکجہتی کی مضبوط بنیاد ہے۔ وزیراعظم نے تمام شہریوں کے مساوی حقوق کے عزم کا اعادہ کیا۔
وزیراعلیٰ پنجاب مریم نواز شریف نے کہا کہ دیوالی کا پیغام امن، محبت اور ہم آہنگی کا ہے۔ انہوں نے اقلیتی برادری کے لیے اسپیشل مائنارٹی کارڈ اور ورچوئل پولیس اسٹیشن کے قیام کا اعلان کیا تاکہ انصاف تک تیز اور مؤثر رسائی ممکن بنائی جا سکے۔
پیپلز پارٹی کے چیئرمین بلاول بھٹو زرداری نے کہا کہ دیوالی یاد دلاتی ہے کہ روشنی ہمیشہ اندھیرے پر غالب آتی ہے، اور یہی پیغام ایک ترقی پسند پاکستان کی بنیاد ہے۔
سندھ حکومت کے ترجمان سکھدیپ ہمنانی نے دیوالی کی مبارکباد دیتے ہوئے ہندو برادری کے لیے عام تعطیل کا اعلان کیا۔ کراچی میں مرکزی تقریب گورنر ہاؤس میں منعقد ہو رہی ہے جس میں گورنر سندھ کامران ٹیسوری مہمانِ خصوصی ہیں۔
شہریوں نے سوامی نارائن مندر سمیت مختلف مندروں میں آتش بازی، پوجا اور خصوصی دعاؤں کے ذریعے خوشی کا اظہار کیا، جہاں مختلف مذاہب کے لوگ بھی شرکت کر کے بین المذاہب ہم آہنگی کا مظاہرہ کر رہے ہیں۔
