لاہور: سسٹین ایبل سوشل ڈیولپمنٹ آرگنائزیشن (ایس ایس ڈی او) کی نئی رپورٹ کے مطابق رواں سال جنوری سے جون تک ملک بھر میں خواتین کے ریپ، اغوا، ہراسانی اور غیرت کے نام پر قتل سمیت تشدد کے مجموعی طور پر 20 ہزار 698 واقعات رپورٹ ہوئے، جن میں صوبہ پنجاب سب سے آگے ہے۔
رپورٹ میں بتایا گیا ہے کہ پنجاب میں 15 ہزار 376، سندھ میں 3 ہزار 709، خیبر پختونخوا میں 875، اسلام آباد میں 423 جبکہ بلوچستان میں 315 کیسز رجسٹر کیے گئے۔
ایس ایس ڈی او کے مطابق ملک بھر میں خواتین پر تشدد کے مقدمات میں سزا کی اوسط شرح نہایت تشویشناک حد تک کم رہی، جو مجموعی طور پر 0.3 فیصد سے بھی نیچے ہے۔ پنجاب میں سزا کی شرح 0.01 فیصد، سندھ میں 0.5 فیصد رہی جبکہ خیبر پختونخوا اور اسلام آباد میں چھ ماہ کے دوران کسی بھی کیس میں سزا نہیں دی گئی۔ رپورٹ کے مطابق بلوچستان میں سزا کی شرح 19.30 فیصد رہی، تاہم وہاں کیسز کی تعداد بہت کم ہے۔
رپورٹ میں سفارش کی گئی ہے کہ مؤثر انصاف کے لیے تحقیقاتی عمل اور پراسیکیوشن کو مزید مضبوط بنایا جائے، بروقت تفتیش کو یقینی بنایا جائے اور متاثرہ خواتین کو محفوظ ماحول فراہم کیا جائے۔
