کراچی – پولیس نے ڈیفنس کے علاقے میں کروڑوں روپے مالیت کی چوری میں ملوث ایک گھریلو ملازم کو گرفتار کرلیا، جس کے قبضے سے سونا اور نقدی برآمد ہوئی ہے۔ ملزم نے دوران تفتیش جرم کا اعتراف بھی کرلیا۔
ترجمان ڈسٹرکٹ ساؤتھ پولیس کے مطابق ساحل پولیس نے ایک خاتون کی شکایت پر کارروائی کرتے ہوئے گھریلو ملازم واجد علی کو گرفتار کیا اور اس کے قبضے سے بھاری مالیت کا سونا اور نقدی برآمد کرلی۔
ترجمان کے مطابق ملزم گزشتہ آٹھ سال سے خاتون کے گھر میں ملازمت کر رہا تھا۔ دوران تفتیش اس نے انکشاف کیا کہ وہ کئی سال سے وقفے وقفے سے گھر سے رقم، سونا، ڈالرز اور قیمتی اشیا چوری کرتا آ رہا تھا۔
ملزم نے بتایا کہ وہ اے ٹی ایم کارڈ اور چیک بک کے ذریعے بھی بھاری رقوم منتقل کرتا رہا، جس کی مجموعی مالیت کروڑوں روپے بنتی ہے۔ پولیس نے ملزم کی نشاندہی پر مزید سامان برآمد کیا جس میں 5 تولہ کے دو، 2 تولہ کے دو اور ایک تولہ کے سات سونے کے بسکٹ سمیت دو لاکھ 27 ہزار روپے نقد شامل ہیں۔
پولیس کے مطابق ملزم نے چوری کی گئی رقم سے قیمتی جائیدادیں اور گاڑیاں خریدنے کا بھی انکشاف کیا ہے۔
ترجمان نے بتایا کہ مقدمہ درج کر کے ملزم کو مزید تفتیش کے لیے انویسٹی گیشن پولیس کے حوالے کر دیا گیا ہے جو اس کے بینک اکاؤنٹس، جائیداد اور دیگر تفصیلات حاصل کر رہی ہے
