کراچی کے علاقے لیاری میں پولیس نے کارروائی کرتے ہوئے لیاری گینگ وار کے سابقہ کمانڈر رحمان ڈکیت کے بھتیجے کو ساتھی سمیت گرفتار کر لیا۔
ایس ایس پی سٹی عارف عزیز کے مطابق ضلع سٹی پولیس نے تھانہ کلاکوٹ کی حدود میں کارروائی کے دوران ملزمان کو مبینہ طور پر واردات کرتے ہوئے رنگے ہاتھوں گرفتار کیا۔ ملزمان کے قبضے سے اسلحہ، راؤنڈز اور چھینی گئی موٹر سائیکل بھی برآمد کر لی گئی۔
گرفتار ملزمان کی شناخت حارث اور راشد علی کے ناموں سے ہوئی ہے۔ پولیس کے مطابق گرفتار ملزم حارث لیاری گینگ وار کے سابقہ کمانڈر رحمان ڈکیت کا بھتیجا ہے۔
پولیس کا کہنا ہے کہ برآمد ہونے والی موٹر سائیکل سے متعلق مقدمہ پہلے ہی تھانہ کلاکوٹ میں درج ہے۔ ترجمان ڈسٹرکٹ سٹی پولیس کے مطابق دونوں ملزمان اس سے قبل بھی متعدد مقدمات میں گرفتار ہو کر جیل جا چکے ہیں۔
ملزمان کے خلاف مقدمات درج کر لیے گئے ہیں جبکہ مزید قانونی کارروائی جاری ہے۔
