کراچی: وفاقی تحقیقاتی ادارے (ایف آئی اے) نے حوالہ ہنڈی اور غیر قانونی کرنسی ایکسچینج کے خلاف بڑی کارروائی کرتے ہوئے ڈیڑھ کروڑ روپے سے زائد مالیت کے امریکی ڈالرز برآمد کرلیے۔
ترجمان ایف آئی اے کے مطابق یہ کارروائی ڈائریکٹر جنرل ایف آئی اے کی ہدایت پر اسٹیٹ بینک سرکل کراچی کی ٹیم نے کی۔ کارروائی کے دوران کلفٹن کے علاقے سے ملزم بلال سلیم کو گرفتار کیا گیا جو حوالہ ہنڈی اور غیر قانونی کرنسی ایکسچینج کے دھندے میں ملوث تھا۔
ملزم کے قبضے سے 55 ہزار امریکی ڈالرز برآمد کیے گئے جبکہ وہ بغیر لائسنس کرنسی ایکسچینج کا کاروبار کر رہا تھا۔ ایف آئی اے نے ملزم سے موبائل فونز اور حوالہ ہنڈی سے متعلق دیگر شواہد بھی حاصل کرلیے ہیں۔
ترجمان کے مطابق ملزم برآمد شدہ کرنسی کے بارے میں تسلی بخش وضاحت پیش نہ کر سکا، جس کے بعد اسے باقاعدہ طور پر گرفتار کر کے تفتیش شروع کر دی گئی ہے۔ ادارے نے ملزم کے دیگر ساتھیوں کی گرفتاری کے لیے چھاپے بھی مارنا شروع کر دیے ہیں۔
