کراچی – گلشن معمار کے علاقے کریم شاہ روڈ پر فائرنگ کے واقعے میں پولیس اہلکار صدام حسین شہید ہوگئے۔
ترجمان ایس ایس پی ویسٹ کے مطابق شہید کانسٹیبل اپنی موٹرسائیکل کا پنکچر لگوا رہے تھے کہ سفید آلٹو کار میں سوار چار نامعلوم ملزمان نے فائرنگ کردی اور موقع سے فرار ہوگئے۔ شہید اہلکار تھانہ گلشن معمار میں تعینات اور رکن قومی اسمبلی شاہدہ رحمانی کے گن مین تھے، جو ڈیوٹی ختم کر کے گھر جا رہے تھے۔
پولیس نے جائے وقوعہ سے 9 ایم ایم کے پانچ اور 30 بور کا ایک خول قبضے میں لے لیا ہے اور مختلف پہلوؤں سے تحقیقات جاری ہیں۔
صوبائی وزیر داخلہ ضیا الحسن لنجار نے واقعے کا نوٹس لیتے ہوئے ایس ایس پی ویسٹ کو ہدایت دی کہ ابتدائی پولیس اقدامات کی تفصیلات فراہم کی جائیں اور شہید اہلکار کے اہل خانہ سے اظہار یکجہتی کیا جائے۔ وزیر داخلہ نے کہا کہ تحقیقات کو عینی شہادتوں کی روشنی میں آگے بڑھایا جائے اور ملزمان کی گرفتاری کے لیے ماہر افسر تعینات کیا جائے۔
