کراچی – یونیورسٹی روڈ سمامہ پل کے قریب نامعلوم مسلح ملزمان کی فائرنگ سے ایک شخص جاں بحق اور ایک زخمی ہوگیا۔ واقعہ مبینہ ٹاؤن تھانے کی حدود میں پیش آیا۔
پولیس کے مطابق دو مسلح موٹر سائیکل سواروں نے بائیک پر سوار افراد کا تعاقب کرتے ہوئے فائرنگ کی، جس کے نتیجے میں پیچھے بیٹھے شخص کو دو گولیاں لگیں۔ جاں بحق شخص کی شناخت محمد انس کے نام سے ہوئی جو کشمیر کا رہائشی تھا، جب کہ بائیک چلانے والا شخص زخمی ہوگیا۔
واقعے کی اطلاع پر پولیس اور کرائم سین یونٹ موقع پر پہنچ گئے اور سی سی ٹی وی فوٹیج سمیت دیگر شواہد اکٹھے کرلیے۔ ابتدائی تحقیقات کے مطابق واقعہ ٹارگٹ کلنگ کا معلوم ہوتا ہے۔ فوٹیج میں دیکھا گیا کہ مقتول موٹر سائیکل پر بیٹھا کسی کا انتظار کر رہا تھا کہ ایک ملزم قریب آیا اور قریب سے فائرنگ کر کے فرار ہوگیا۔ دونوں ملزمان فائرنگ کے بعد موٹر سائیکل پر سوار ہو کر نیپا کی سمت فرار ہوگئے۔
