بالی ووڈ کی معروف اداکارہ کنگنا رناوت کا کہنا ہے کہ ان کا فلمی اور سیاسی سفر بالی ووڈ کے سپر اسٹار شاہ رخ خان کے مقابلے میں زیادہ چیلنجنگ رہا ہے۔
دہلی میں ایک تقریب سے خطاب کرتے ہوئے 39 سالہ کنگنا نے کہا کہ ان کی کامیابی کی اہمیت اس لیے زیادہ ہے کیونکہ وہ بھارتی ریاست ہماچل پردیش کے ایک چھوٹے سے گاؤں بھملہ سے تعلق رکھتی ہیں۔ ان کے مطابق بالی ووڈ میں شاذ و نادر ہی کوئی دیہی پس منظر رکھنے والا شخص اس سطح تک پہنچ پایا ہے۔
کنگنا نے کہا کہ شاہ رخ خان چونکہ دہلی جیسے شہری ماحول اور اعلیٰ تعلیم سے وابستہ پس منظر رکھتے ہیں، اس لیے انہیں کئی مواقع نسبتاً آسانی سے ملے، جب کہ خود انہیں اپنے دیہی پس منظر کے باعث بے شمار رکاوٹوں کا سامنا کرنا پڑا۔ ان کے بقول شہری اور دیہی پس منظر کے فرق نے ان کے فلمی سفر کو مزید مشکل اور محنت طلب بنا دیا۔
اداکارہ نے مزید کہا کہ ہر شخص کو اپنی جدوجہد اور کامیابی پر فخر ہونا چاہیے۔ “مجھے اپنی جدوجہد پر فخر ہے، اگر لوگ میرے مؤقف سے اختلاف بھی کریں تو مجھے کوئی پرواہ نہیں، کیونکہ میں سچ پر یقین رکھتی ہوں اور ہمیشہ خود سے سچ بولتی ہوں۔”
یاد رہے کہ کنگنا رناوت نے 2006 میں فلم گینگسٹر سے بالی ووڈ میں ڈیبیو کیا تھا، جس کے لیے انہیں بیسٹ فی میل ڈیبیو فلم فیئر ایوارڈ سے نوازا گیا تھا۔ ان کی پہلی ہی فلم کامیاب ثابت ہوئی، جس کے بعد انہوں نے پیچھے مڑ کر نہیں دیکھا۔
