بالی ووڈ کے سینئر اداکار پنکج دھیر طویل عرصے تک کینسر میں مبتلا رہنے کے بعد 68 برس کی عمر میں انتقال کرگئے۔ ان کے اہلِ خانہ نے ان کے انتقال کی تصدیق کرتے ہوئے بتایا کہ وہ کئی مہینوں سے زیرِ علاج تھے۔
پنکج دھیر نے اپنے فنی سفر کا آغاز تھیٹر سے کیا اور بعدازاں فلم و ٹی وی کی دنیا میں نمایاں مقام حاصل کیا۔ انہوں نے مقبول ٹی وی سیریل "مہابھارت” میں کرن کا کردار ادا کر کے بے پناہ شہرت حاصل کی۔ فلمی دنیا میں بھی وہ سولجر اور بادشاہ جیسی کامیاب فلموں میں اپنی شاندار اداکاری سے ناظرین کے دلوں میں جگہ بنا گئے۔
اداکار کے انتقال کی خبر سنتے ہی فلمی دنیا میں غم کی لہر دوڑ گئی۔ ساتھی فنکاروں، ہدایتکاروں اور مداحوں نے سوشل میڈیا پر ان کے فن اور شخصیت کو خراجِ عقیدت پیش کیا۔
پنکج دھیر کے بیٹے نکیتن دھیر بھی بالی ووڈ انڈسٹری کا حصہ ہیں اور اپنے والد کے نقشِ قدم پر چل رہے ہیں۔ بتایا گیا ہے کہ اداکار کی آخری رسومات ممبئی میں ادا کی جائیں گی جہاں قریبی ساتھی اور مداح انہیں الوداع کہیں گے۔
