راولپنڈی پولیس نے کارروائی کرتے ہوئے گوجرخان میں بزرگ خاتون سے بالیاں اور پرس چھیننے میں ملوث ملزم کو زخمی حالت میں گرفتار کر لیا۔
پولیس کے مطابق واقعے کا سی پی او راولپنڈی نے فوری نوٹس لیتے ہوئے ملزم کی گرفتاری کے احکامات جاری کیے تھے۔ ناکہ بندی کے دوران موٹرسائیکل سوار ملزم نے پولیس پر فائرنگ کی، تاہم اس کے اپنے پستول سے چلنے والی گولی اس کے ہاتھ پر لگ گئی، جس کے نتیجے میں وہ زخمی ہو گیا۔
پولیس کا کہنا ہے کہ گرفتار ملزم نے اعتراف کیا کہ اس نے ایک روز قبل تھانہ گوجرخان کے علاقے میں بزرگ خاتون سے پرس چھینا اور زبردستی ان کی طلائی بالیاں بھی نوچ لی تھیں۔
ملزم کے قبضے سے چھینی گئی طلائی بالیاں، 20 ہزار روپے نقدی، مسروقہ موٹرسائیکل اور اسلحہ برآمد کر لیا گیا، جبکہ زخمی ملزم کو علاج کے لیے ہسپتال منتقل کر دیا گیا ہے۔
سی پی او راولپنڈی کی ہدایت پر اے ایس پی اور ایس ایچ او گوجرخان نے بزرگ خاتون کے گھر جا کر برآمد شدہ سامان ان کے حوالے کیا۔ بزرگ خاتون نے پولیس کی بروقت کارروائی پر اظہارِ تشکر کیا، جبکہ سی پی او سید خالد ہمدانی نے پولیس ٹیم کی کارکردگی کو سراہا۔
