گھروں میں ملازمت کا بہانہ بنا کر وارداتیں کرنے والا گروہ گرفتار کر لیا گیا ہے۔ پولیس کے مطابق غالب مارکیٹ آپریشن و انویسٹی گیشن ونگ کی مشترکہ کارروائی کے دوران دو ملزمان—بھائی اور بہن—کو سی سی ٹی وی فوٹیج اور جدید ٹیکنالوجی کی مدد سے ضلع ننکانہ صاحب سے گرفتار کیا گیا۔
تفتیش میں انکشاف ہوا کہ خاتون ملزمہ کینال پارک، غالب مارکیٹ میں کویت پلٹ فیملی کے گھر کام کرتی تھی اور اسی نے اپنے بھائی اور ماموں زاد بھائی کے ساتھ مل کر ڈکیتی کی منصوبہ بندی کی۔ چند روز قبل ملزمان نے گھر والوں کو یرغمال بنا کر قیمتی سامان لوٹا اور فرار ہو گئے تھے۔
گرفتار ملزمان کی شناخت ارم اور اس کے بھائی علی کے نام سے ہوئی ہے، جبکہ تیسرے ملزم سمیع کی گرفتاری کے لیے چھاپے مارے جا رہے ہیں۔ پولیس نے کارروائی کے دوران کویتی دینار، دو تولے سونا، نقدی اور پستول برآمد کر لیا۔
ایس پی ماڈل ٹاؤن نے عوام سے اپیل کی ہے کہ اپنے گھریلو ملازمین کی مکمل تصدیق متعلقہ تھانے سے ضرور کروائیں تاکہ ایسے واقعات کی روک تھام کی جا سکے۔
