لاہور – قانون نافذ کرنے والے اداروں نے تحریک لبیک پاکستان (ٹی ایل پی) کے مختلف دفاتر اور اسٹورز پر مشترکہ کارروائیاں کرتے ہوئے کروڑوں روپے مالیت کا سونا، غیر ملکی کرنسی اور قیمتی سامان برآمد کر لیا۔
ذرائع کے مطابق، حکام نے کل 1922 اعشاریہ 5 گرام سونا ضبط کیا، جس میں 445 گرام طلائی چوڑیاں و کڑے، 490 گرام ہار، چین، لاکٹ اور 355 گرام انگوٹھیاں و دیگر زیورات شامل ہیں، جبکہ 898 گرام چاندی بھی برآمد ہوئی۔
مزید برآمد شدہ سامان میں 69 مختلف برانڈز کی گھڑیاں اور 72 متفرق قیمتی اشیا شامل ہیں۔ ضبط شدہ غیر ملکی کرنسی میں 2885 یورو، 4250 پاونڈز، 8592 ریال، 5000 انڈین روپے، 200 کینیڈین ڈالر، 1440 درہم، 84 ملیشین کرنسی، 1 امریکی ڈالر، 2500 ہانگ کانگ ڈالر اور 250 عراقی دینار شامل ہیں۔
ابتدائی تخمینے کے مطابق برآمد شدہ رقم اور زیورات کی مالیت تقریباً 7 کروڑ 17 لاکھ 65 ہزار روپے بنتی ہے۔ مزید تحقیقات جاری ہیں۔
