پاکستان کے معروف یوٹیوبر اور کانٹینٹ کریئیٹر عرفان جونیجو جلد ہی تاریخ رقم کر سکتے ہیں، کیونکہ وہ ممکنہ طور پر ایف سی بارسلونا کے کھلاڑیوں کا انٹرویو کرنے والے پہلے پاکستانی بننے جا رہے ہیں۔
یونیورسٹی آف کراچی میں منعقدہ میڈیاورس 2.0 ایونٹ کے دوران گفتگو کرتے ہوئے عرفان جونیجو نے انکشاف کیا کہ اسپین کے مشہور فٹبال کلب ایف سی بارسلونا کے ساتھ ایک خصوصی اشتراک پر بات چیت جاری ہے۔
ان کا کہنا تھا کہ اگرچہ یہ بات چیت ابھی ابتدائی مراحل میں ہے، تاہم ابتدائی ملاقاتیں ہو چکی ہیں۔ عرفان نے امید ظاہر کی کہ “اگر سب کچھ منصوبے کے مطابق ہوا تو یہ خواب جلد حقیقت بن جائے گا۔”
عرفان جونیجو کی اس پیشرفت کی خبر سامنے آتے ہی سوشل میڈیا پر مداحوں نے جوش و خروش کا اظہار کیا۔ صارفین نے اسے پاکستانی ڈیجیٹل تخلیق کاروں کے لیے عالمی سطح پر ایک بڑی کامیابی قرار دیا۔
