پاکستان نے نیو ڈیولپمنٹ بینک (NDB) — جسے پہلے بریکس ڈویلپمنٹ بینک کہا جاتا تھا — کی رکنیت حاصل کرنے کے لیے چین کی حمایت طلب کر لی ہے، تاکہ کثیرالجہتی مالی ذرائع تک رسائی میں توسیع ہو اور دونوں ممالک کے درمیان اقتصادی تعاون مزید مضبوط بنایا جا سکے۔
یہ پیشرفت وفاقی وزیر خزانہ محمد اورنگزیب اور چین کے نائب وزیر خزانہ لیاؤ من کے درمیان واشنگٹن ڈی سی میں ہونے والی ملاقات کے دوران سامنے آئی، جو آئی ایم ایف اور ورلڈ بینک کے اجلاسوں کے موقع پر منعقد ہوئی۔
وزارتِ خزانہ کے جمعہ کو جاری بیان کے مطابق، وزیر خزانہ نے چین سے پاکستان کی این ڈی بی میں شمولیت کے لیے حمایت طلب کی اور معلوماتی ٹیکنالوجی، زراعت، صنعت اور معدنیات کے شعبوں میں چینی سرمایہ کاری کے اضافے کا خیرمقدم کیا۔
نیو ڈیولپمنٹ بینک بریکس ممالک — برازیل، روس، بھارت، چین اور جنوبی افریقہ — نے ترقی پذیر ممالک میں انفراسٹرکچر اور پائیدار ترقیاتی منصوبوں کے لیے قائم کیا تھا۔ بینک کی رکنیت بعد ازاں دیگر ابھرتی ہوئی معیشتوں تک بھی پھیل چکی ہے۔
ملاقات کے دوران وزیر خزانہ نے آئی ایم ایف کے ساتھ حال ہی میں طے پانے والے اسٹاف لیول معاہدے کے بارے میں بھی آگاہ کیا، جسے انہوں نے حکومت کی اقتصادی اصلاحات کی عالمی سطح پر توثیق قرار دیا۔ انہوں نے چینی مارکیٹ میں پانڈا بانڈ کے اجراء سے متعلق تازہ پیش رفت پر بھی تبادلہ خیال کیا۔
وزیر خزانہ نے آئی ایم ایف ایگزیکٹو ڈائریکٹر کے دفتر کا شکریہ ادا کیا اور لیا و من کو پاکستان کے دورے کی دعوت دی۔
