اسلام آباد: صدر مملکت آصف علی زرداری نے دیوالی کے موقع پر پاکستان سمیت دنیا بھر میں مقیم ہندو برادری کو دلی مبارکباد پیش کی ہے۔
صدر زرداری نے اپنے پیغام میں کہا کہ دیوالی روشنی کے اندھیرے پر، اور نیکی کے بدی پر غلبے کی علامت ہے۔ یہ دن امن، رواداری، ہمدردی اور ہم آہنگی جیسے اعلیٰ اور آفاقی انسانی اقدار کی یاد دہانی کراتا ہے۔
انہوں نے کہا کہ پاکستان میں موجود تمام اقلیتیں ملک کی ترقی اور خوشحالی میں اہم کردار ادا کر رہی ہیں، اور ریاست اقلیتوں کے حقوق کے تحفظ کے لیے پرعزم ہے۔
صدر نے امید ظاہر کی کہ دیوالی کا یہ مبارک موقع محبت، بھائی چارے، باہمی احترام اور قومی یکجہتی کو مزید فروغ دینے کا باعث بنے گا۔ انہوں نے دعا کی کہ یہ تہوار تمام شہریوں کے لیے خوشیاں، روشنی اور امن کا پیغام لے کر آئے۔
صدر زرداری نے ایک مرتبہ پھر ہندو برادری کو دیوالی کی خوشیوں پر نیک تمناؤں کے ساتھ مبارکباد پیش کی۔
