پاکستان اور دیگر سات مسلم اکثریتی ممالک کے وزرائے خارجہ نے جمعرات کو ایک مشترکہ بیان جاری کرتے ہوئے یروشلم اور اس کے اسلامی و مسیحی مقدس مقامات کی تاریخی اور قانونی حیثیت میں کسی بھی قسم کی تبدیلی کی کوششوں کو مسترد کر دیا۔
وزرائے خارجہ نے یروشلم کے اسلامی اور مسیحی مقدس مقامات پر اسرائیلی قابض حکام کی جانب سے "تاریخی و قانونی حیثیت کی بار بار خلاف ورزیوں” کی مذمت کی۔
انہوں نے بالخصوص اسرائیلی آبادکاروں اور "انتہا پسند وزراء کی جانب سے مسجد اقصیٰ/الحرم الشریف میں اسرائیلی پولیس کی حفاظت میں مسلسل دراندازیوں، اور اس کے صحنوں میں اسرائیلی پرچم لہرانے” پر شدید افسوس کا اظہار کیا۔
یہ مشترکہ بیان پاکستان، مصر، ترکی، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ کی جانب سے جاری کیا گیا۔
