وزیراعلیٰ پنجاب مریم نواز شریف نے صوبے کے پہلے موبائل پولیس سٹیشن اینڈ لائسنسنگ یونٹ پراجیکٹ کا باقاعدہ افتتاح کر دیا۔ افتتاحی تقریب میں وزیراعلیٰ نے منصوبے کے مختلف حصوں کا تفصیلی معائنہ کیا اور سٹاف سے ملاقات بھی کی۔
تفصیلات کے مطابق، موبائل پولیس سٹیشن شہریوں کے لیے ایف آئی آر کے اندراج، ڈرائیونگ لائسنس کے اجراء اور تجدید سمیت دیگر سہولتیں فراہم کرے گا۔
اس یونٹ میں لرنر، ریگولر، انٹرنیشنل اور ویمن لائسنسنگ کی سہولت بھی دستیاب ہوگی۔
موبائل پولیس سٹیشنز گرلز ایجوکیشن سینٹرز، ورکنگ ویمن اور دور دراز علاقوں میں بھی خدمات فراہم کریں گے، جس سے عوام کو سہولت اور وقت کی بچت ہوگی۔
اس موقع پر وزیراعلیٰ مریم نواز نے موبائل پولیس سٹیشن اور لائسنسنگ یونٹ کی چابیاں متعلقہ افسران کے سپرد کرتے ہوئے سٹاف کو عوام کے ساتھ خوش اخلاقی اور ہمدردانہ رویہ اپنانے کی ہدایت کی۔
وزیراعلیٰ پنجاب کو منصوبے کی ورکنگ کے بارے میں تفصیلی بریفنگ دی گئی، جس پر انہوں نے کہا کہ یہ اقدام عوام کو ان کی دہلیز پر پولیس اور لائسنسنگ خدمات فراہم کرنے کی جانب ایک انقلابی قدم ہے۔
