وزیراعلیٰ پنجاب مریم نواز شریف کی ہدایت پر پنجاب پولیس بجلی چوروں کے خلاف بھرپور کریک ڈاؤن جاری رکھے ہوئے ہے۔
پنجاب پولیس کے ترجمان نے تفصیلات سے آگاہ کرتے ہوئے بتایا کہ رواں سال اب تک لاہور سمیت صوبہ بھر میں بجلی چوروں کے خلاف 75 ہزار 582 مقدمات درج کیے گئے ہیں، اور 51 ہزار 948 ملزمان کو گرفتار کیا گیا ہے۔
ترجمان نے مزید بتایا کہ بجلی چوری کے 50 ہزار 980 مقدمات کے چالان مکمل کیے گئے ہیں اور 11 ہزار سے زائد ملزمان کو عدالتوں سے سزائیں اور جرمانے کروائے گئے ہیں۔
صوبائی دارالحکومت لاہور میں 21 ہزار 697 مقدمات درج کیے گئے اور 26 ہزار 760 بجلی چوروں کو گرفتار کیا گیا۔
آئی جی پنجاب ڈاکٹر عثمان انور نے بجلی چوروں کے خلاف کریک ڈاؤن جاری رکھنے کا حکم دیتے ہوئے کہا کہ قومی خزانے کو نقصان پہنچانے والے عناصر کے خلاف ترجیحی کارروائیاں جاری رکھی جائیں گی۔
