لاہور: پولیس نے خاتون کے قتل کے الزام میں مقتولہ کے شوہر کو گرفتار کرلیا ہے۔
تفصیلات کے مطابق 35 سالہ رخسانہ کی بوری بند لاش راوی ٹول پلازہ کے قریب جھاڑیوں سے ملی تھی، جس پر تشدد کے واضح نشانات موجود تھے۔ پولیس نے واقعہ کی اطلاع پر مقدمہ اپنی مدعیت میں قتل کی دفعات کے تحت درج کیا تھا۔
تحقیقات کے دوران پولیس نے مقتولہ کے شوہر شکیل کو ہارون آباد سے گرفتار کرلیا۔ سامنے آنے والی سی سی ٹی وی فوٹیج میں ملزم کو گھر سے بوری میں لاش لے جاتے دیکھا جاسکتا ہے۔
دریں اثنا وزیراعلیٰ پنجاب مریم نواز شریف کی ہدایت پر مسلم لیگ (ن) کی رہنما حنا پرویز بٹ نے مقتولہ کے گھر جا کر اہل خانہ سے تعزیت کی اور وزیراعلیٰ پنجاب کا ہمدردی کا پیغام پہنچایا۔ انہوں نے متاثرہ خاندان کو مکمل قانونی اور نفسیاتی معاونت فراہم کرنے کی یقین دہانی کرائی۔
