کراچی: ملیر کینٹ کے علاقے راشدی گوٹھ میں نشے کی حالت میں گاڑی چلانے والے شخص نے تیز رفتاری کے دوران متعدد موٹرسائیکل سواروں اور ایک لوڈر رکشہ کو ٹکر ماردی۔
پولیس کے مطابق ملزم کی شناخت عظمت علی شاہ کے نام سے ہوئی ہے جو ڈبل کیبن ریوو گاڑی چلا رہا تھا۔ واقعے کے بعد پولیس نے فوری کارروائی کرتے ہوئے ملزم کو گرفتار کرلیا اور گاڑی اپنے قبضے میں لے لی۔
پولیس حکام کا کہنا ہے کہ گاڑی کی تلاشی کے دوران تین اسٹرونگ بیئر کے کین برآمد ہوئے جن میں سے ایک آدھا استعمال شدہ تھا۔ واقعے پر دو مقدمات درج کیے گئے ہیں — ایک لاپرواہی سے ڈرائیونگ جبکہ دوسرا شراب برآمد ہونے پر۔
پولیس کے مطابق ملزم کے پاس ڈرائیونگ لائسنس بھی موجود نہیں تھا۔ حادثے کے بعد مشتعل شہریوں نے ڈرائیور کو تشدد کا نشانہ بنایا جس کے نتیجے میں وہ زخمی ہوگیا، تاہم پولیس نے اسے حراست میں لے کر تھانے منتقل کردیا۔
