اسلام آباد (میڈیا ہائیڈ نیوز ڈیسک) — معروف گلوکار عاصم اظہر نے اچانک اپنے انسٹاگرام اکاؤنٹ سے تمام پوسٹس ڈیلیٹ کرکے مداحوں کو حیران کردیا۔ گلوکار نے صرف ایک مختصر پیغام "خدا حافظ” کے ساتھ اپنی انسٹاگرام اسٹوری شیئر کی، جس کے بعد ان کا پورا فیڈ خالی نظر آنے لگا۔
ذرائع کے مطابق، عاصم اظہر کے اس غیر متوقع اقدام نے سوشل میڈیا پر مختلف قیاس آرائیاں جنم دے دی ہیں۔ مداح یہ جاننے کے لیے بے چین ہیں کہ آخر اس فیصلے کے پیچھے کیا وجہ ہوسکتی ہے۔
یہ اقدام اس وقت سامنے آیا ہے جب حال ہی میں عاصم اظہر نے اسلام آباد میں ہونے والے ایک میوزک کنسرٹ کے دوران ایونٹ آرگنائزرز پر تاخیر کے باعث ناراضی کا اظہار کیا تھا۔ اس کے علاوہ وہ اداکارہ یشما گل کی سالگرہ تقریب میں بھی نظر آئے تھے، جہاں ان کی ہانیہ عامر کے ساتھ ایک وائرل گانے پر جھومتی ویڈیو بھی توجہ کا مرکز بنی۔
کچھ شائقین کا کہنا ہے کہ شاید یہ فیصلہ ان کی نجی زندگی میں آنے والی تبدیلیوں کے باعث کیا گیا ہے، کیونکہ حالیہ خبروں کے مطابق، عاصم اظہر اور ان کی منگیتر اداکارہ میرُب علی کے درمیان تعلقات ختم ہوگئے ہیں۔
دوسری جانب، یہ صورتحال اس وقت مزید دلچسپ ہوگئی جب مداحوں نے اداکارہ علیزے شاہ کے سوشل میڈیا بریک کے ساتھ اس واقعے کا موازنہ کیا، جنہوں نے بھی کچھ عرصہ قبل اپنی تمام انسٹاگرام تصاویر ڈیلیٹ کردی تھیں۔
اب تک عاصم اظہر یا ان کی ٹیم کی جانب سے کوئی باضابطہ وضاحت سامنے نہیں آئی ہے، جبکہ مداح ان کے اگلے قدم کے منتظر ہیں۔
