کراچی: ناظم آباد کے قریب ناگن چورنگی پر فائرنگ کے ایک افسوسناک واقعے میں تین بچوں کا باپ اور آن لائن موٹرسائیکل رائیڈر ڈاکوؤں کی گولیوں کا نشانہ بن گیا۔
پولیس کے مطابق نامعلوم موٹرسائیکل سوار ملزمان نے اندھا دھند فائرنگ کی جس کے نتیجے میں 55 سالہ محمد اسماعیل ولد محمد عیسیٰ موقع پر جاں بحق ہوگئے، جبکہ 17 سالہ راہگیر سہیل ولد عبدالرشید زخمی ہوا۔ لاش اور زخمی کو عباسی شہید اسپتال منتقل کردیا گیا۔
ایس ایچ او نیو کراچی کا کہنا ہے کہ دو موٹرسائیکلوں پر سوار چار ملزمان نے نامعلوم وجوہات پر فائرنگ کی، مقتول کے پیٹ میں دو گولیاں لگیں۔ تاہم عینی شاہدین کے مطابق واقعہ موبائل فون چھیننے کی کوشش کے دوران پیش آیا۔
عینی شاہد گداگر اور تسبیح فروش نے بتایا کہ ملزمان نے مقتول سے موبائل فون چھینا، تاہم اسماعیل نے مزاحمت کی اور موبائل واپس لینے کی کوشش کی جس پر ایک ملزم نے فائرنگ کردی۔ ملزمان نے چھ گولیاں چلائیں اور موقع سے فرار ہوگئے۔
مقتول کے بیٹے حارث کے مطابق اسماعیل پہلے واٹر پمپ کے قریب جوتوں کی دکان چلاتے تھے، مگر کاروباری نقصان کے بعد آن لائن موٹرسائیکل رائیڈنگ کا کام شروع کیا تھا۔ واقعے کے وقت وہ سواری کا انتظار کر رہے تھے۔
علاقہ مکینوں نے بتایا کہ اس علاقے میں روزانہ کئی وارداتیں ہوتی ہیں جبکہ پولیس کی موجودگی کے باوجود ملزمان بلاخوف کارروائیاں کرتے ہیں۔
