کراچی: پاکستان کسٹمز انفورسمنٹ نے موچکو چیک پوسٹ پر کارروائی کرتے ہوئے بلوچستان سے کراچی آنے والی مسافر بس کے ذریعے اسمگل شدہ اشیاء کی منتقلی کی کوشش ناکام بنا دی۔
کسٹمز حکام کے مطابق مسافر بس نمبر ایل ای ایس 5724 کی تلاشی کے دوران خفیہ خانوں سے 9 کلوگرام اسمگل شدہ چاندی اور مختلف برانڈز کی 8 ہزار بھارتی ویاگرا گولیاں برآمد ہوئیں۔
پاکستان کسٹمز کے ترجمان نے بتایا کہ برآمد شدہ چاندی، ویاگرا گولیوں اور مسافر بس کی مجموعی مالیت تقریباً 3 کروڑ 15 لاکھ روپے ہے۔ کسٹمز نے مقدمہ درج کرکے بس سمیت تمام برآمد شدہ اشیاء کو ضبط کرلیا ہے جبکہ مزید تفتیش جاری ہے۔
