کراچی: اسپیشل انویسٹی گیشن یونٹ (ایس آئی یو) نے خفیہ اطلاع پر کارروائی کرتے ہوئے خواجہ اجمیر نگری سے تین انتہائی مطلوب بھتہ خوروں کو گرفتار کرلیا۔
ایس ایس پی ایس آئی یو و سی آئی اے امجد احمد شیخ کے مطابق گرفتار ملزمان کا تعلق خطرناک "بہادر پی ایم ٹی گروہ” سے ہے۔ پولیس نے کارروائی کے دوران ملزمان کے قبضے سے غیر قانونی اسلحہ اور گولیاں بھی برآمد کیں۔ چھاپے کے دوران ملزمان نے پولیس کو دیکھ کر فائرنگ کی تاہم اہلکاروں نے حکمت عملی سے گھیر کر تینوں مسلح ملزمان اویس، شاہد اور ابوبکر کو گرفتار کرلیا۔
ایس ایس پی امجد شیخ کے مطابق ابتدائی تفتیش میں اہم انکشافات سامنے آئے ہیں۔ ملزمان تاجروں کی ریکی کرکے ان کے خاندان کے بارے میں معلومات حاصل کرتے اور یہ تفصیلات گروہ کے سرغنہ بہادر پی ایم ٹی کو دیتے تھے۔ گرفتار بھتہ خور تاجروں کو بھتے کے لفافے پہنچانے کے ساتھ سنگین نتائج کی دھمکیاں بھی دیتے تھے۔
افسر کے مطابق ملزمان تاجروں کے گھروں اور دفاتر پر ہوائی فائرنگ کی وارداتوں میں بھی ملوث ہیں۔ پولیس نے ان کا سابقہ مجرمانہ ریکارڈ حاصل کرلیا ہے جس کے مطابق ملزمان پر بھتہ خوری، غیر قانونی اسلحہ رکھنے اور پولیس پر فائرنگ کے متعدد مقدمات درج ہیں۔ مزید تفتیش جاری ہے۔
