کراچی: شہرِ قائد کے علاقے گلبرگ رحمان آباد بلاک 5 میں ایک گھر سے میاں بیوی کی لاشیں برآمد ہوئیں جن کی شناخت 35 سالہ خدا بخش ولد اللہ بخش اور 30 سالہ یاسمین زوجہ خدا بخش کے نام سے ہوئی ہے۔
پولیس کے مطابق مکان نمبر B-182 محمدی مسجد کے قریب واقع گھر سے خاتون کی گلا کٹی لاش خون میں لت پت حالت میں ملی جبکہ مرد کی لاش پنکھے سے لٹکی ہوئی تھی۔ اطلاع پر پولیس موقع پر پہنچی اور فورنزک ماہرین کو طلب کر کے شواہد اکھٹے کیے۔ بعدازاں لاشوں کو ایدھی ایمبولینس کے ذریعے عباسی شہید اسپتال منتقل کردیا گیا۔
پولیس ترجمان نے بتایا کہ جاں بحق میاں بیوی کے پانچ بچے ہیں اور ان کا تعلق پنجاب کے ضلع بھکر سے ہے۔ وہ تقریباً پانچ سال قبل کراچی منتقل ہوئے تھے۔
جاں بحق شخص کے بہنوئی محمد حنیف کے مطابق میاں بیوی کے درمیان معمولی نوک جھونک رہتی تھی لیکن کبھی سنگین نوعیت کا جھگڑا نہیں ہوا۔ پیر کی شب دس بجے یاسمین سے فون پر بات ہوئی تو اس نے کہا کہ صبح آنا، تاہم رات تقریباً بارہ بجے خدا بخش کا بیٹا راشد آیا اور اطلاع دی کہ والدین جاں بحق ہو گئے ہیں۔
محمد حنیف کے مطابق، خدا بخش کے دونوں بڑے بیٹے کام پر گئے ہوئے تھے جبکہ دو چھوٹے بھائی اور بہن گھر کے صحن میں سو رہے تھے۔ واپسی پر جب کمرہ بند پایا تو کھڑکی سے جھانک کر دیکھا کہ والد پنکھے سے لٹکے ہوئے ہیں اور والدہ خون میں لت پت فرش پر پڑی ہیں۔
پولیس نے ضابطے کی کارروائی کے بعد لاشیں ورثا کے حوالے کردیں اور پنجاب لے جانے کے لیے راہداری (این او سی) جاری کردی۔ میاں بیوی کی تدفین ان کے آبائی علاقے بھکر میں کی جائے گی۔ پولیس نے واقعے کی مزید تحقیقات شروع کردی ہیں تاکہ معلوم کیا جا سکے کہ یہ قتل ہے یا خودکشی۔
