لاہور: کوٹ لکھپت پولیس نے جنرل اسپتال میں مریضوں کے لواحقین کو نشانہ بنانے والے جیب تراش گروہ کے دو ارکان کو گرفتار کرلیا۔
پولیس کے مطابق ملزمان راجا اور بلال کو سی سی ٹی وی فوٹیجز کی مدد سے گرفتار کیا گیا، فوٹیجز میں دونوں ملزمان کو اسپتال آنے والے مریضوں کے لواحقین کی جیبوں سے سامان نکالتے ہوئے واضح طور پر دیکھا جا سکتا ہے۔
پولیس کے مطابق ملزمان متعدد وارداتوں میں لاکھوں روپے، موبائل فونز اور دیگر قیمتی اشیا چوری کر چکے ہیں، جبکہ ان کے قبضے سے پستول بھی برآمد ہوا ہے۔
ایس پی ماڈل ٹاؤن اخلاق اللہ تارڑ نے بتایا کہ ملزمان کے خلاف مقدمہ درج کرلیا گیا ہے اور مزید تفتیش جاری ہے۔ انہوں نے کہا کہ عوام کی جان و مال کی حفاظت پولیس کی اولین ترجیح ہے۔
