کراچی کے علاقے جمشید کوارٹر کی حدود میں واقع کشمیر اسپورٹس کمپلیکس سے 35ویں نیشنل گیمز کے لیے رکھا گیا تقریباً 22 لاکھ روپے مالیت کا کھیلوں کا سامان چوری کرلیا گیا۔
پولیس کے مطابق ایک ملزم محمد واجد کو گرفتار کرلیا گیا ہے جبکہ اس کے قبضے سے کچھ چوری شدہ سامان بھی برآمد ہوا ہے۔ تاہم ماضی میں کی گئی چوریوں کا سامان اس نے اپنے ساتھیوں کے ساتھ مل کر کباڑیے کو فروخت کردیا تھا۔
سندھ اولمپکس ایسوسی ایشن کے آرگنائزر احمد علی راجپوت کے مطابق اس سے قبل بھی دو مرتبہ کشمیر اسپورٹس کمپلیکس سے گیمز کا سامان چوری ہوچکا ہے۔ سیکرٹری آرچری ایسوسی ایشن سندھ اعجاز علی کے مطابق چوری شدہ سامان کی مالیت تقریباً 22 لاکھ روپے ہے۔
ایس ایچ او تھانہ جمشید کوارٹر انصر بٹ کے مطابق ملزم سے مزید تفتیش جاری ہے اور پولیس باقی ملوث افراد اور سامان کی برآمدگی کے لیے کارروائی کررہی ہے۔
