فیصل آباد: سوشل میڈیا پر چوہے اور نیولے کی لڑائی کروانے کی ویڈیو سے مشہور ہونے والے نوجوان استاد قمر کو پولیس نے گرفتار کر لیا تاہم وارننگ دینے کے بعد چھوڑ دیا گیا۔
پولیس کے مطابق استاد قمر نے شہرت حاصل کرنے کے لیے چوہے اور نیولے کی لڑائی کروائی تھی جس کی ویڈیو وائرل ہونے پر کارروائی عمل میں لائی گئی، لیکن تحقیقات سے معلوم ہوا کہ ویڈیو ڈیڑھ سال پرانی ہے۔
پوچھ گچھ کے دوران استاد قمر نے اپنے عمل پر ندامت کا اظہار کرتے ہوئے پنجاب پولیس سے معافی مانگی اور وعدہ کیا کہ آئندہ کسی جانور کو نقصان نہیں پہنچائے گا۔
ایک نئی ویڈیو بیان میں استاد قمر نے اعلان کیا کہ وہ چوہے پکڑنے کا کام چھوڑ چکے ہیں اور اپنے اہلِ خانہ کی خواہش پر دھاگے کی ایک فیکٹری میں ملازمت اختیار کر لی ہے۔ انہوں نے عوام سے درخواست کی کہ اب انہیں چوہے پکڑنے کے کام کے حوالے سے تنگ نہ کیا جائے۔
