نُومان علی نے مچادی دھوم! آئی سی سی نے پاکستانی اسپنر کو ’پلیئر آف دی منتھ‘ کیلئے نامزد کردیا

پاکستان کے اسپنر نومان علی کو انٹرنیشنل کرکٹ کونسل (آئی سی سی) کی جانب سے اکتوبر 2025 کے پلیئر آف دی منت ایوارڈ کے لیے نامزد کیا گیا ہے۔
اس ایوارڈ کے لیے جنوبی افریقہ کے آل راؤنڈر سینورن متھوسامی اور افغانستان کے لیگ اسپنر راشد خان کو بھی نامزد کیا گیا ہے۔
آئی سی سی ٹیسٹ بولرز رینکنگ میں تیسرے نمبر پر موجود نومان علی نے گزشتہ ماہ شاندار کارکردگی دکھائی، انہوں نے 14 وکٹیں 23.07 کی اوسط سے حاصل کر کے دنیا کے سب سے مستقل مزاج اسپنرز میں اپنی شناخت مزید مضبوط کی۔
لاہور میں کھیلے گئے پہلے ٹیسٹ میں نومان علی نے شاندار بولنگ کا مظاہرہ کرتے ہوئے 6/112 اور 4/79 کے اعداد و شمار کے ساتھ اپنی تیسری 10 وکٹوں کی کارکردگی حاصل کی اور پاکستان کو 93 رنز سے فتح دلائی۔
راولپنڈی ٹیسٹ میں بھی انہوں نے چار وکٹیں حاصل کیں اور 17 قیمتی رنز بنائے، یوں وہ سیریز کے سب سے کامیاب بولر ثابت ہوئے۔
دوسری جانب، جنوبی افریقہ کے سینورن متھوسامی نے پاکستان کے خلاف ڈرا ہونے والی ٹیسٹ سیریز میں شاندار کارکردگی دکھائی۔
31 سالہ آل راؤنڈر نے بلے اور گیند دونوں سے عمدہ کھیل پیش کیا — انہوں نے 106 رنز 53 کی اوسط سے بنائے اور 11 وکٹیں 18.36 کی اوسط سے حاصل کر کے پلیئر آف دی سیریز کا ایوارڈ جیتا۔
ان کی نمایاں کارکردگی میں لاہور میں 11/174 کی بہترین بولنگ اور راولپنڈی میں ناقابلِ شکست 89 رنز شامل ہیں۔
ادھر افغانستان کے راشد خان نے بھی شاندار ماہ گزارا، انہوں نے بنگلہ دیش اور زمبابوے کے خلاف ون ڈے اور ٹی ٹوئنٹی دونوں فارمیٹس میں بہترین کارکردگی دکھائی۔
پانچ ٹی ٹوئنٹی میچز میں راشد نے 9 وکٹیں حاصل کیں، صرف 4.82 کی اکانومی ریٹ کے ساتھ۔ ان کی نمایاں بولنگ میں بنگلہ دیش کے خلاف 4/18 اور زمبابوے کے خلاف 3/9 شامل ہیں۔
ون ڈے سیریز میں راشد خان نے افغانستان کو بنگلہ دیش کے خلاف 3-0 کی کلین سویپ میں اہم کردار ادا کیا۔ انہوں نے 11 وکٹیں 2.73 کی اکانومی ریٹ سے حاصل کیں، جن میں دوسرے میچ میں 5/17 کی شاندار کارکردگی شامل ہے۔
انہوں نے نیچے کے نمبروں پر قیمتی رنز بھی بنائے، اور یوں ان کے لیے یہ ماہ ہمہ جہت کارکردگی سے بھرپور ثابت ہوا۔