کراچی: سپر ہائی وے جنجال گوٹھ میں نامعلوم ملزمان نے گھر میں گھس کر عوامی نیشنل پارٹی (اے این پی) کے مقامی عہدیدار کو فائرنگ کرکے قتل کردیا۔ مقتول اس وقت قرآن پاک کی تلاوت کر رہے تھے۔
ڈی ایس پی سہراب گوٹھ اورنگ زیب خٹک اور ایس ایچ او ولایت شاہ کے مطابق واقعہ سائٹ سپر ہائی وے صنعتی ایریا کے علاقے جنجال گوٹھ میں پیش آیا، جہاں نامعلوم مسلح افراد نے 55 سالہ سمیع اللہ باجوڑی پر فائرنگ کی جس سے وہ موقع پر جاں بحق ہوگئے۔
ابتدائی تفتیش کے مطابق مقتول اپنے گھر کی بیٹھک میں قرآن پاک کی تلاوت کر رہے تھے کہ دو نامعلوم افراد اندر داخل ہوئے اور انہیں تین گولیاں مار کر فرار ہوگئے۔
اطلاع ملنے پر پولیس کی بھاری نفری اور کرائم سین یونٹ موقع پر پہنچے اور شواہد اکٹھے کیے گئے۔
پولیس کا کہنا ہے کہ مقتول سمیع اللہ باجوڑی عوامی نیشنل پارٹی کے علاقائی صدر تھے اور ان پر اس سے قبل بھی حملہ ہوچکا تھا۔ ابتدائی معلومات کے مطابق اہل خانہ نے شبہ ظاہر کیا ہے کہ واقعہ ذاتی دشمنی کا نتیجہ ہوسکتا ہے، تاہم پولیس نے تمام پہلوؤں سے تفتیش شروع کردی ہے۔
عوامی نیشنل پارٹی سندھ کے ترجمان رحمان بابر کے مطابق مقتول اے این پی ضلع شرقی نیو سبزی منڈی یوسی 8 کے صدر تھے۔ ترجمان نے واقعے کی شدید مذمت کرتے ہوئے قاتلوں کی فوری گرفتاری کا مطالبہ کیا ہے۔
