کراچی: ایف آئی اے امیگریشن نے کراچی ایئرپورٹ پر دو الگ کارروائیوں کے دوران عمرہ اور وزٹ ویزے کی آڑ میں یورپ اور بیلاروس جانے کی غیر قانونی کوشش ناکام بنا دی۔
ترجمان ایف آئی اے کے مطابق پہلی کارروائی میں پانچ مسافروں کو فلائٹ نمبر PA-170 سے آف لوڈ کیا گیا جو عمرہ ویزے پر سعودی عرب جا رہے تھے۔ گرفتار افراد میں راحید اللہ، عبدالحمید، عبدالشکور، اسماعیل اور احمد اللہ شامل ہیں، جن کا تعلق بنوں، پشاور، خیبر اور مہمند کے مختلف علاقوں سے ہے۔
ابتدائی تفتیش میں انکشاف ہوا کہ مسافر پشاور کے مختلف ایجنٹوں سے رابطے میں تھے اور سعودی عرب سے مصر، لیبیا کے راستے سمندر کے ذریعے اٹلی جانے کا منصوبہ رکھتے تھے۔ انہوں نے ایجنٹوں کو فی کس 45 لاکھ روپے طے کیے تھے جن میں سے 15 لاکھ روپے فی کس لیبیا پہنچنے پر ادا کیے جانے تھے۔
ایف آئی اے نے تمام مسافروں کو مزید قانونی کارروائی کے لیے اینٹی ہیومن ٹریفکنگ سرکل کراچی کے حوالے کردیا۔
دوسری کارروائی میں ایف آئی اے امیگریشن نے دو مسافروں کو وزٹ ویزے کی آڑ میں غیر قانونی طور پر بیلاروس جانے کی کوشش کے دوران گرفتار کرلیا۔ گرفتار مسافروں کی شناخت محمد آکاش اور اسد رحمان کے نام سے ہوئی جو کوٹلی، آزاد کشمیر کے رہائشی ہیں۔
دونوں مسافر فلائٹ نمبر FZ-330 کے ذریعے آذربائیجان جا رہے تھے۔ امیگریشن کلیرنس کے دوران ان کے دستاویزات مشکوک پائے گئے۔ تحقیقات کے مطابق دونوں کا تعلق راولپنڈی کے ایک ایجنٹ سے تھا۔
اسد رحمان کا پاسپورٹ ٹمپرڈ پایا گیا جبکہ ویزہ صفحات غائب تھے۔ مسافروں کے سامان سے جعلی ویزے، پولیس کردار سرٹیفیکیٹ، اور پروٹیکٹر اسٹیمپس بھی برآمد ہوئیں۔ ان کے موبائل فونز سے آذربائیجان کے جعلی ورک ویزے، بینک ٹرانزیکشنز اور دیگر مشکوک دستاویزات کی تصاویر بھی ملی ہیں۔
ایف آئی اے کے مطابق دونوں مسافروں نے ایجنٹ کو فی کس 16 لاکھ روپے ادا کیے جن میں 14 لاکھ روپے کیش اور بینک کے ذریعے منتقل کیے گئے۔ دونوں ملزمان کو مزید تحقیقات کے لیے اینٹی ہیومن ٹریفکنگ سرکل کراچی منتقل کر دیا گیا ہے۔
