لاہور — شاعر مشرق علامہ محمد اقبال کا 148واں یومِ پیدائش آج ملک بھر میں عقیدت و احترام کے ساتھ منایا جا رہا ہے۔ اس موقع پر مختلف شہروں میں تقریبات، سیمینارز اور مشاعرے منعقد کیے جا رہے ہیں تاکہ اس عظیم مفکر، شاعر اور رہنما کو خراجِ عقیدت پیش کیا جا سکے جنہوں نے برصغیر کے مسلمانوں میں خودی اور آزادی کا شعور بیدار کیا۔
یومِ اقبال کا آغاز مزارِ اقبال لاہور پر گارڈز کی تبدیلی کی پروقار تقریب سے ہوا، جہاں پاکستان نیوی کے دستے نے سلامی دی اور پھولوں کی چادریں چڑھائی گئیں۔
مختلف تقریبات میں مقررین نے علامہ اقبال کے افکار اور فلسفہِ خودی پر روشنی ڈالتے ہوئے کہا کہ اقبال کا پیغام آج بھی نوجوانوں کے لیے رہنمائی کا سرچشمہ ہے۔ تعلیمی اداروں میں تقاریر اور شاعری کے مقابلوں کا اہتمام کیا گیا تاکہ نئی نسل کو اقبال کے افکار سے روشناس کرایا جا سکے۔
