لاہور: پولیس نے شہر بھر میں نقب زنی کی متعدد وارداتوں میں ملوث ایک مطلوب ملزم کو گرفتار کرلیا ہے جس کے قبضے سے کروڑوں روپے مالیت کا چوری شدہ سامان برآمد ہوا ہے۔
تفصیلات کے مطابق ڈی آئی جی انویسٹی گیشن سید ذیشان رضا کی ہدایات پر ایس ایس پی انویسٹی گیشن محمد نوید کی نگرانی میں کارروائی کی گئی۔ ملزم کی گرفتاری کا ٹاسک انچارج انویسٹی گیشن شاد باغ تنزیل الرحمٰن کو دیا گیا تھا۔
پولیس نے کارروائی کے دوران ساڑھے تین کروڑ روپے مالیت کے 70 تولے طلائی زیورات، آرٹیفشل جیولری، چھ قیمتی گھڑیاں، دو ٹیبلٹس، چھ ایل سی ڈیز، موبائل فونز اور نقب زنی کے آلات برآمد کرلیے۔
ایس ایس پی محمد نوید کے مطابق ملزم دن کے وقت گھروں کی ریکی کرتا اور رات کو بند گھروں سے قیمتی سامان چرا کر فرار ہو جاتا تھا۔ دورانِ تفتیش ملزم نے لاہور کے مختلف علاقوں میں نقب زنی کی متعدد وارداتوں کا اعتراف کیا۔
ایس ایس پی انویسٹی گیشن نے کہا کہ جرائم پیشہ عناصر کے خلاف بلاامتیاز کارروائیاں جاری رہیں گی، شہریوں کے جان و مال کا تحفظ پولیس کی اولین ترجیح ہے۔ انہوں نے انچارج شاد باغ تنزیل الرحمٰن اور پولیس ٹیم کی کارکردگی کو سراہتے ہوئے انہیں تعریفی اسناد بھی دیں۔
