پشاور: شادی کی خوشی میں کی جانے والی ہوائی فائرنگ دلہا اور ساتھیوں کے لیے وبالِ جان بن گئی۔ پولیس نے تھانہ تہکال کی حدود میں منعقدہ شادی کی تقریب میں فائرنگ کرنے پر دلہا سمیت 12 افراد کو گرفتار کرلیا۔
پولیس کے مطابق فارسٹ بازار میں شادی کے موقع پر شدید ہوائی فائرنگ کی گئی، جس کی ویڈیوز بعد ازاں سوشل میڈیا پر وائرل ہوگئیں۔ پولیس حکام نے ویڈیو کا نوٹس لیتے ہوئے فوری کارروائی کے احکامات جاری کیے۔
ڈی ایس پی ٹاؤن سرکل ارباب نعیم حیدر کی سربراہی میں پولیس ٹیم نے ملزمان کا سراغ لگا کر تمام افراد کو گرفتار کرلیا، جن میں دلہا جبران بھی شامل ہے۔
گرفتار ملزمان کے قبضے سے ایل ایم جی گن، ایم فور رائفل، دو کلاشنکوف اور ایک پستول برآمد ہوئی۔ تھانہ تہکال میں مقدمہ درج کرکے مزید تفتیش شروع کردی گئی ہے۔
