اسلام آباد کے علاقے کھنہ میں پولیس اہلکاروں نے بہادری کا مظاہرہ کرتے ہوئے مسلح راہزنوں کی واردات ناکام بنا دی۔
ترجمان اسلام آباد پولیس کے مطابق چھ مسلح ڈاکو دو ہونڈا 125 موٹر سائیکلوں پر واردات کے ارادے سے جا رہے تھے کہ معمول کی چیکنگ میں مصروف پولیس ٹیم سامنے آگئی۔ ملزمان نے پولیس کو دیکھتے ہی اندھا دھند فائرنگ کر دی۔
فائرنگ کے نتیجے میں دو پولیس جوانوں کو سیدھی گولیاں لگیں تاہم بلٹ پروف جیکٹ اور ہیلمٹ کے باعث وہ محفوظ رہے۔
پولیس کا کہنا ہے کہ فائرنگ کے دوران تین ڈاکو اپنے ہی ساتھیوں کی گولیوں سے زخمی ہوئے اور موقع سے گرفتار کر لیے گئے، جبکہ ان کے قبضے سے اسلحہ بھی برآمد ہوا۔
باقی ملزمان کی گرفتاری کے لیے علاقے میں سرچ آپریشن جاری ہے۔
