لیہ: لیہ میں پیسے کی لالچ میں اپنا ہی نومولود بچہ فروخت کرنے والا شخص تقریباً ایک سال بعد پولیس کے ہتھے چڑھ گیا۔
کروڑ لعل عیسن میں بچے کی والدہ کی مدعیت میں مقدمہ درج کر لیا گیا ہے، جس میں چار دیگر افراد کو بھی نامزد کیا گیا ہے۔
خاتون کے مطابق مقامی اسپتال میں بچے کی پیدائش کے بعد شوہر نے بتایا کہ نومولود کی حالت خراب ہے اور اسے لیہ اسپتال لے جایا جا رہا ہے۔ خاتون کا کہنا ہے کہ جب بھی اس نے بچے کی واپسی کا مطالبہ کیا تو شوہر ٹالتا رہا اور آخرکار اسے گھر سے نکال دیا۔ مسلسل کوششوں کے بعد خاتون نے شوہر کے خلاف مقدمہ درج کرایا۔
پولیس تفتیش میں ملزم نے اعتراف کیا کہ اس نے نومولود بچے کو 8 لاکھ روپے میں فروخت کیا، جبکہ بچے خریدنے والے جوڑے نے بھی یہ بات تسلیم کر لی۔
پولیس کا کہنا ہے کہ ڈی این اے ٹیسٹ کے بعد بچہ حقیقی ماں کے حوالے کر دیا جائے گا، جبکہ ملزم کو گرفتار کر کے مزید تحقیقات جاری ہیں۔
